Sögulegt og gaman

,,Jæja Palli minn nú sé ég mig knúin til að sýna þér gula spjaldið... já það er orðið löngu tímabært". Ég starði á viðmælanda minn og spurði fyrir hvað?. ,,Já það þýðir ekki að stara á mig eins og álfur út úr hól og þykjast ekki vita neitt. Ég er daglegur gestur á blogginu þínu og það er farið að líða full langt á milli færsla".

Hefst nú betrunin. 

Ég er engin sérstakur áhugamaður um flug og flugvélar, en hef samt lúmskt gaman af. Um liðna helgi var sannkallaður flugdagur á Akureyrarflugvelli í tilefni þess að Flugsafnið hélt upp á 10 ára afmælið sitt ef ég man rétt. Hafði lúmskt gaman af því sem þar fór fram. Kappakstur milli flugvélar og bíls, fallhlífarstökk og sýningar atriði á þyrlu Landhelgisgæslunnar. Hér má sjá Rússnesk/Ameríska  tvíþekju etja kappi við Chevrolett Camaro 550 hestafla bíl í spyrnu á flugbrautinni. Flugvélin er að sögn með álíka mörk hestöfl. Flugvélin vann næsta öruggann sigur.   

 

 Sea king þyrla LHG sýndi ýmis atriði og m.a. fjarlægði hún bíl sem var fyrir. Þulur hafði marg kallað í hátalarakerfið að bíll með xxxx númer væri fyrir og eigandinn beðin að fjarlægja hann strax.... nokkrar tilkynningar og svo koma sýningin. Þyrlan flaug með hann hangandi neðan í og lét hann gossa áhorfendum til mikillar ánægju. Taka verður fram að bílinn hafði látist á bíladögum daginn áður.

Rétt áður en sleppt var

 Stutt í lendingu

Búið spil. 

Sýningin var hin skemmtilegasta og vel þess virði að eyða dagparti þarna. Takk fyrir mig. Ég sagði ykkur frá því í síðustu færslu að á þjóðhátíðardaginn hafi verið fótboltaleikur hér á Akureyri sem er nýlunda. Þá fengu Þórsarar í heimsókn á Akureyrarvöll ólafsvíkur Víking og lögðu þá örugglega. Svo fengum við þá aftur í heimsókn á sunnudaginn og skemmst er frá því að segja að Þór vann þá aftur. Meira af íþróttum í gær kom fyrrum vesturbæjarstórveldið KR í heimsókn á Akureyrarvöll og mættu stelpunum í Þór/KA í Pepsí-deild kvenna. Skemmst er frá því að segja að Þór/KA vann 2-1 sigur á KR og má lesa góða umfjöllun um leikinn á heimasíðu Þórs og ummæli þjálfara og leikmanna.Ungar og upprennandi knattspyrnukonur úr 6. fl. Þórs fylgdu leikmönnum inn á völlinn. Þá slógu hjörtu margra ótt og títt. Elsta barnabarni mitt Margrét Birta sem æfir með 6. fl. var í þessum fríða hópi og var hún þess heiðurs aðnjótandi að leiða A-landsliðskonuna og fyrirliða Þór/KA Rakel Hönnudóttir inná völlinn. Eru þær Margrét Birta og Rakel þær sem ganga næstar dómurunum. 

Hvað um það leikinn unnu heimamenn 2-1 eins og áður segir og skoraði m.a. Silvía Rán Sigurðardóttir fyrra mark heimamanna og Mateja Zver hið síðara.

Silvía Rán

Fagnað í leikslok. 

Þegar maður var yngri og hafði enn gaman af því að leika sér af bílum.... þ.e. eftir að maður fékk bílpróf man ég að skipta mátti niður mönnum eftir því hvaða bílategund var í uppáhaldi hjá viðkomandi. Willys CJ 5, Willys Jeepster, Rússjeppi (Gaz) Ford Bronco,  Austin Gipsy eða Land Rover og guð má vita hvað bílarnir hétu. Jepparnir þá voru sterkbyggðir, einfaldir og fínir til síns brúks. Í dag fer lítið fyrir þessu gömlu bílum, þeir sjást vart nema á sýningum nema svo mikið breyttir að engin þekkir þá. Ég rakst þó á einn gamlan og góðan GAZ rússajeppa. Óbreyttur, örlítið skakkur eftir áralanga þjónustu en samt enn við góða heilsu og þjónar eiganda sínum hvern dag.

 

Það skal upplýst hér að sjálfur var ég forfallinn aðdáandi Willys jeep og Jeepster og átti nokkra á sínum tíma. Einnig þótti mér vænt um Ford Bronco en einn slíkan af 1967 árg  átti ég  og líkaði ágætlega.

Hver veit nema ég birti svo mynd af nærbuxnableiku Bjöllunni hans Nóa Björns? þangað til bara bíða.

Ég get þó ekki lokið þessu án þess að sýna ykkur mynd sem ég tók á Þórsvellinum nýja í dag þar sem verið var að prufa nýja springler vökvunarkerfið..... þvílík snilld

 

 

 

 

 

 

 

 

Og stúkan sem nú er fullbyggð að innan sem utan. 

Minni svo á flickr síðuna mína þar er að finna fleiri myndir 

Fróðleikur dagsins: Þýska þingið telur 672 þingmenn og er stærsta kjörna lögþing heimsins

Gaman

Í fyrsta sinn svo ég muni var fótboltaleikur á Þjóðhátíðardaginn sjálfan. Sumir segja þetta helgispjöll aðrir segja þetta hið besta mál, Jón gamli Sig hefði ekki gert neina athugasemd við þetta. Hvað um það mínir menn tóku á móti Ólafsvíkur Víkingum í bikarleik. Skítakuldi og smá skúrir með köflum. Samt lét leikmenn Þórs veðrið engin áhrif hafa á sig og unnu leikinn sannfærandi 3-1. fyrir þá sem ólmir vilja lesa um leikinn þá bendi ég á umfjöllun um hann á heimasíður Þórs. Var með myndavélin á lofti eins og svo oft áður. Vilji menn skoða myndir þá er hægt að nálgast þær hér. Myndin sem hér fylgir er af Ármann Pétri Ævarssyni en hann skoraði eitt marka Þórs í leiknum. 

Í vikunni fengum við góða heimsókn þegar heiðurshjónin og Skagfirðingarnir Jón Ósmann og Marta Sigtryggs droppuðu inn. Ávallt gaman að fá þau í heimsókn og ekki síður að sækja þau heim. Þá kemur maður ekki að tómum kofanum. Þá er snúist í kringum mann og manni þjónað í bak og fyrir eins um kónga væri að ræða.

Í dag var svo ákveðið að leyfa tveimur af þremur barnabörnunum að sofa hjá afa og ömmu þær Margrét Birta og Elín Alma. Heimsókn þeirra byrjaði með því að þær hjálpuðu afa við undirbúning matarins. Ritzkex bollur sem er í miklu uppáhaldi hjá þeim. Eins og sést á myndinni lögðu þær sig alla fram við að gera þetta vel úr verki.

Eftir kvöldmat farið í freyðibað og um kvöldið var svo afa popp, horft á sjónvarpið og DVD og næs. Hér er nostrað við krílin, já bara gaman.

Fróðleikur dagsins: Ef skurðlæknir í Egyptalandi til forna missti sjúkling á skurðarborðinu voru hendur hans höggnar af

Að standa við gefin loforð

Ég hét ykkur því, lofaði eða hótaði að grobba mig örlítið yfir útskrift sonarins og sýna ykkur myndir síðar. Nú er komið síðar og komið að smá grobb - bloggi. Sölli útskrifaðist frá Háskólanum á Akureyri með B.A. próf í Samfélags- og hagþróunarfræði með 1. einkunn. Einkunnir hans eru einstaklega glæsilegar í alla staði og Prófessorinn sem fór yfir lokaritgerðina hans sagði í umsögn að ritgerðin væri alger snilld og svo ofsalega fræðimannslega unninn. Ritgerðin er rituð á ensku og nærri 60 síður og ber titilinn The North Atlantic region and socio-economic impacts of global change: tracking change using artic social indicators.

Áður en haldið var upp í íþróttahöll þar sem útskriftin fór fram  dró Sölmundur fram ritgerðina og blaðaði aðeins í henni. Pabbi snöggur að smella einni. 

Hvorki fleiri né færri en 289 voru brautskráðir þennan dag og því var gríðarlegur fjöldi fólks mætt í höllina til að vera með sínu fólki. Hér er Sölmundur að taka við skírteininu úr höndum Birgis Guðmundssonar Lektors.

Svo var tekið i höndina á deildarforsetum og rektor. Á þessari stundu var pabbinn ekkert smá stoltur. 

Eftir athöfnina fórum við svo heim í Drekagilið þar sem við fengum okkur brauð með gröfnum- og reyktum laxi og öðru góðgæti. Engin önnur veisluhöld þennan daginn. Mamman ekki sátt að fá ekki að baka en engu tauti var komið við soninn - enga veislu takk. 

Myndatökur heima í bak og fyrir.

Með ömmu og afa

Með systkinabörnunum 

Og svo með systrum sínum.

Um kvöldið fórum við svo öll saman út að borða á Greifann. Og auðvitað fóru amman og afinn með. Frábær matur fínn staður og dásamleg kvöldstund. Sumir lifðu sig meir inn í þá athöfn að snæða en aðrir

Já stundum gleymir maður stund og stað þegar maður snæðir.Eftir mat var farið á rúntinn sem endaði eins og svo oft.... í Brynju. Já Brynjuís klikkar ekki frekar en fyrri daginn. 

Og í lokinn mátti ég til að stoppa og taka Nonna tali enda var hann gáfu maður mikill og víðförull. Ein mynd af honum í lok dagsins sem er vel við hæfi.

Nú svo heldur lífið bara áfram sinn vanagang. Sölli heldur sinni vinnu áfram en hann er að vinna í fjárreiðudeild á skrifstofum Akureyrarbæjar. Já hann er einn af þeim sem heldur utan um peningana hjá bænum. Þetta er allt vel við hæfi, nýr bæjarstjóri Hermann Jón Tómasson og Sölli eru nú einu sinni flokksbræður.

Fróðleikur dagsins er í boði Alberts Einstein:

Ég hugsa aldrei um framtíðina hún kemur nógu snemma.

 

Útskrift og facebook

Laugardagurinn 13. júní verður óneytanlega stór dagur í lífi fjölskyldu minnar. Sonurinn útskrifast frá Háskólanum á Akureyri, fyrstur barna okkar. Get ekki neitað því að við ,,gamla" settið erum u.þ.b. að deyja úr stolti. Okkur finnst það bara allt í lagi.

Þótt það sé í sjálfu sér ekki fréttnæmt þá heimsóttum við ættarhöfuðin í gær. En það sem vakti kátínu hjá mér var þegar mamma kom til mín með myndavélina og sagði ,,Palli taktu mynd af mér sem ég get notað, ég er að spá í að opna facebook síðu". Já það verður seint sagt um mömmu að hún sé íhaldsöm og óttist breytingar. Ég tók mynd af henni á hennar myndavél og svo á mína líka. Og hér er afraksturinn. Hver veit nema þessi mynd muni birtast á facebook á næstu dögum?

Sá fullorðni lét sér fátt um finnast og hallaði undir flatt og lét fara vel um sig í stofunni. Glott út í annað ef ekki bæði og örlítið fuss og pínulítið svei.... netið, facebook pifff

Held samt að hann hafi lúmskt gaman af þessu og reyni bara að espa fólk upp til að lífga upp á umræðurnar.

Hvað um það við brugðum okkur svo í kvöld í heimsókn til Önnu systir og kíktum á nýju íbúðina sem hún var að flytja inn í. Fín íbúð og er ég sannfærður um að þarna á eftir að fara vel um hana. Kaffi, súkkulaði rúsínur og létt spjall fram yfir miðnætti, notaleg kvöldstund. Takk fyrir okkur. 

Á heimleiðinni var farið út að Ytra Krossanesi og tekin ein mynd af sólsetrinu. Gríðarlega fallegt og vel lukkuð mynd þótt ég segi sjálfur frá. Myndin segir allt sem segja þarf. Fallegt.

Ef að líkum lætur þá mun ég birta einhverjar grobbmyndir frá útskrift sonarins við tækifæri.

Fróðleikur dagsins: Ef þú setur rúsínu í kampavínsglas mun hún sökkva til botns og fljóta upp á yfirborðið til skiptis

Gáfaður afi

Eitt af því sem er svo gaman við að foreldri er að uppfræða.... já þá finnst manni maður vera svo gáfaður. Eftir því sem börnin stækka og þroskast fækkar þeim stundum sem maður fær að vera í friði í þessu eftirsóknarverða hlutverki þ.e.a.s. að vera uppfræðari. Það kemur nefnilega að því að börnin vaxa manni yfir höfuð svo yfir höfuð. En þegar neyðin er hæst er hjálpin næst.   - Afi -. Mikið ofboðslega er það dásamlegt að verða afi þá kemur nefnilega aftur þessi tími sem er svo skemmtilegur, Uppfræðari. Jebb back to the future.

Í gær fór ég í göngutúr með elsta barnabarninu mínu henni Margréti Birtu. Reyndar fór hún á hjóli, afi á tveimur haltrandi en þó jafnfljótum. Rétt austan við Hlíðarbrautina nær þeim hluta sem brúin við gamla Möl og Sand er þar er göngustígur sem ekki allir vita um. Nálægt einni af stærstu umferðargötum bæjarins fallegur stigur og ég skora á fólk sem ekki hefur farið hann að gera það.

Sú stutta átti það til að segja ,,afi þú bara labbar áfram og ég kem bráðum, ég næ þér". Svo kom þessi skotta á fleygi ferð fram úr afa. Á u.þ.b. miðri leið hafði hún leikið þennan leik og þegar afi náði henni hafði hún stillt upp og sviðsett slys. Afi varð að ganga í gildru en fékk að smella af henni mynd.

Þegar komið er upp úr stignum að sunnan er maður rétt við göngubrúna yfir Glerá. Horft til suðurs í átt að Súlum. Ofan við brúnna sem bílarnir aka yfir má sjá undir henni í gömlu Glerárbrúnna sem muna má sinn fífil fegurri. 

 

 

 

 

 

 

 

 

 

 

 

Nú ef maður snýr sér í 180 gráður og horfir til norðurs sést vel að Glerárgilið er fallegt. Í fjarska má sjá hið tignarlega fjall Kaldbak

Á baka leiðinni var tekin annar hefðbundinn göngustígur. Við ræddum örlítið um hvað er stórt og hvað er lítið á víðum grunni. Já það fer vissulega eftir því hvernig maður litur á hlutina. Við Hlíðarbrautina standa m.a. 4 blokkir sem eru 8 hæðir. Daglega eru þessar blokkir kallaðar ,,Mjólkurfernurnar". Ef þú horfir á blokkirnar út frá þessu sjónarhorni þá virðist blokkin ekki vera svo ýkja há miðað við Grenitréð sem við stóðum við.

Eftir smá labb til viðbótar var húsið skyndilega orðið risa stórt. 

Það er ekki alltaf allt sem sýnist eða þannig. Við héldum áfram og gengum sem leið lá uppá Hlíðarbrautina og stoppuðum við nyrsta hringtorgið við Hlíðarbrautina og þá mátti sjá allar Mjólkurfernurnar. Í fyrstu fannst barninu sú sem næst vera  hlyti að vera sú stærsta. En eftir stutta útskýringu þá skildi barnið

Já nú kemur smá tenging sem barninu þótt gaman af. Blokkin sem næst er á myndinni er byggð sem stúdentagarðar fyrir nema í Háskólanum á Akureyri. Og það sem meira er að á neðstu hæð hússins er leikskóli sem heitir Tröllaborgir. Við gegnum upp fyrir húsið og virtum börnin í leikskólanum fyrir okkur sem voru að leik á lóð leikskólans.

En hvað sér maður þegar maður horfir í austur? Jú Háskólann. Þangað munu vonandi flest ef ekki öll þessi börn fara síðar á lífsleiðinni. Eins og mamma og pabbi sagði barnið og Sölli frændi sem er að fara útskrifast á laugardaginn. 

Þar sem Háskólinn stendur í dag var áður rekin stofnun fyrir þroskaskert fólk og hét sú stofnun Sólborg. Austast á lóð háskólans er tignarlegt hús þ.e. Rannsóknarhús Háskólans. Falleg bygging sem hlaut nafnið Borgir.

Færum okkur aðeins um set. Þá sjáum við fallegt listaverk sem heitir Íslandsklukkan. Á vef háskólans er sagt um þetta verk  „Íslandsklukka - Þetta verk var gert til minningar um 1000 ára kristnitökuafmæli og landafundi í vesturheimi og sögu þjóðarinnar í stóru og smáu. 1. desember ár hvert verða slegin saman saga þjóðarinnar og hljómur samtímans.“

Þessi mynd var þó ekki tekin í göngutúrnum og ekki heldur síðasta myndin þar sem sést heima að Sólborg séð frá bílaplaninu við búðina Strax við Hlíðarbraut.

Göngutúrnum lauk. Barnið var miklu mun fróðara. Afinn grobbinn og fannst hann vera ofboðslega gáfaður. Barnið naut stundarinnar með afa og afi naut stundarinnar með barninu og endurheimti máske glatað stolt, já hann var svo gáfaður. Trúlegt að göngutúrarnir með barnabörnunum eigi bara eftir að fjölga á komandi misserum svona ef guð og lukkan og heilsan leyfir. 

Málsháttur dagsins: Ungur nemur gamall temur

 

Kaldbakur á siglingu á pollinum

Óhætt er að segja að það hafi verið líflegt við Pollinn í gær Sjómannadaginn. Sjómannadagurinn s.l. ár hafa verið heldur daufir hér norðanlands en nú varð skemmtileg breyting á. Í gær var hópsigling báta úr Sandgerðisbót þar sem Húni II fór fremstur í flokki. Honum fylgdu milli 30 og 40 smábátar af öllum stærðum og gerðum.

Já eins og ég sagði voru bátarnir af ýmsum toga sem sigldu á Pollinum í gær

Já sum fleyin voru skrítnari en önnur. Svo vor sum fleyin bara eins og gera mátti ráð fyrir

Svo var eitt fley sem bar stórt nafn. Nafnið hefur verið á togurum frá því 1947 þegar ÚA keypti sinn fyrsta síðutogara. Því næst var það sett á skuttogara sem smíðaður var á Spáni á 8.áratug síðustu aldar. Hef lúmskan grun um að fyrrum stýrimaður og skipstjóri eigi þennan myndarbát í dag. Gaman af þessu

ÝR EA

Aðalnúmerið í gær var hins vegar Húni II. Fallegt skip, smíðað í skipasmíðastöð KEA. Þessum bát kynntist ég fyrst þegar ég var á vertíð á Höfn í Hornafirði þá var hann gerður út þaðan og hét Haukafell SF.

Þótt ótrúlegt megi virðast þá var fremur fátt fólk sem lagði leið sína niður að sjó til að fylgjast með. Samt einn og einn.

Binni pabbi skýrir allt út fyrir syninum .......... já sonur hafði býr yfir hundrað hættum

Og gamla styttan ,,Litli sjómaðurinn" sem lengi stóð fyrir framan Búnaðarbankann er nú framan við Menningarhúsið Hof sem sumir kalla stærsta bryggjupolla í heimi.

Eftir var skroppið með þeim fullorðnu á rúntinn um bæinn og rent við í Brynju og keyptur ís, nema hvað

Fróðleikur dagsins: Margir sjómenn voru með gullhring í eyranu svo hægt væri að borga fyrir almennilega útför þegar þeir dæju.

Vanafastur - ég nei

Ég verð að játa það og ég geri það af auðmýkt - ég er vanafastur. Ég ætla líka játa það að ég skammast mín bara ekkert fyrir það. Ekkert. En ég á það samt til að breyta út af vananum og gera eitthvað nýtt......... svona af og til. Á laugardag tókum við hjónakornin upp á því að taka ekki þennan hefðbundna labbitúr í Kjarnaskógi. Stefnan var tekin á gönguleiðina í Naustaborgum. Og af því að játningar eru svo ofarlega í mér nú þá kemur enn ein játningin. Þótt Naustaborgir séu hér við nefið á mér og hafa verið það sl. 51 ár þá hef ég aldrei farið þessa leið.

Ég veit ekki hvort það kom mér á óvart hversu fallegt umhverfið er þarna eður ei, en alla vega sannaðist máltækið góða um að fara yfir lækinn til að sækja vatnið svo rækilega. Menn leita oft langt yfir skammt í leit að fallegu landslagi, kyrrð og notaleg heitum. Auðvitað á maður að hafa annað máltæki ofarlega í huga sér ,,líttu þér nær maður". Það eina sem ég finn að þessu annars fallega stað eru hinar mörgu raflínur - af þeim er talsverð sjónmengun, ég horfi bara fram hjá því.

Þegar göngutúrinn hófst sagði ég við mína ekta frú. Þú skilur mig bara eftir í rykmekki eins og vanalega. Eigum við ekki bara hittast hér eftir 50 mínútur. Samþykkt. Bæði gengum við af stað þegar tíminn var u.þ.b. hálfnaður hugðist ég snúa við. Það kviknaði ljós. Hér sest ég niður og tek mynd af frú Margréti þegar hún kemur yfir hæðina. Flottur staður og ég kem henni í opna skjöldu. Ég settist á stein utan stígs og beið................... og ég beið.............. og beið..... og beið. Þá hringir síminn........... Palli það er svo fallegt hérna að ég snéri ekki við heldur hélt göngunni áfram og fer alla leið inní Kjarnaskóg - hittu mig þar. En myndin er hér þótt frúna vanti...ég skal ná henni þótt síðar verði. En, Déskoti snéri mín á mig núna

Þetta er sem sagt myndin sem ég tók og átti að sýna konuna koma yfir hæðina. Staðurinn er fallegur en konuna vantaði. Ég á eftir að launa henni lambið gráa.

Ég snéri til baka í bílinn. Á leið minni inní Kjarnaskóg til að ná í konuna tók ég þessa mynd af hesti. Hvort hér er um einhvern gæðing að ræða eður ei veit ég ekki. En mynd er falleg þótt ég segi sjálfur frá og er stoltur af henni. 

Í gærkvöld fórum við feðgar á aðalfund körfuknattleiksdeildar Þórs. Fínn fundur þar sem menn ræddu útkomu síðasta árs og lögðu línurnar fyrir komandi vetrar. Þeir horfa til framtíðar, flottur fundur þar sem  menn ætla halda áfram að vinna vel undir forystu Kára Þorleifssonar formanns.

Eftir fund tókum við feðgar stuttan bíltúr - bótin - Krossanes - Leira og fl. 

Þar var þessi mynd tekin. Bótin, gula og rústrauða húsið með bláa þakinu og Byrgi rjómagula húsið með rauða þakinu. Lengst til vinstri á miðri mynd má svo sjá gamla skólann í Glerárþorpi. Falleg mynd sem snýr vel kyrrðina á þessu fallega sunnudagskvöldi.

Heima biðu okkar góðir gestir. Aníta systurdóttir mín og Davor maðurinn hennar, sem búsett eru í Reykjanesbæ. Gaman að fá góða gesti í heimsókn. Margt skrafað. Því miður áttaði ég mig á því þegar þau voru farin að ég gleymdi að smella mynd af þeim mikið fjandi var ég spældur þegar ég áttaði mig á því. En ég á auðvitað myndir af þeim og hér er mynd af Anítu á fjölskyldumóti 2007 myndin er tekin á Melsgil. Í fljótheitum fann ég enga góða mynd af Davor en úr því verður bætta þótt síðar verði. Aníta og Davar takk fyrir innlitið.

Svo bara rúllar þetta áfram. Labb í dag í Naustaborgum og hvað næst er ekki gott að segja. Segið svo að maður sé vanafastur.

Málsháttur dagsins: Sá sem rétt gerir hefur rólega samvisku

Hart mætir hörðu sagði kerlingin og settist á stein

Aldrei þessu vant þá settist ég fyrir framan sjónvarpið og horfði á fótbolta. Þvílík gargandi snilld. Ekki þarf að fara mörgum orðum um skemmtanagildið þegar FC Barcelona er annars vegar. Þeir tóku Manchester Utd. svo rækilega í kennslustund að það hálfa væri nóg. 2-0 sigur Börsunga var öruggari en tölurnar gefa til kynna. En mikið fjandi hefði verið gaman ef Eiður Smári hefði fengið að taka einhvern þátt í þessu í kvöld. Hann fékk að vísu verðlaunapening um hálsins í leikslok, held ég en að öðru leiti var hann bara áhorfandi eins og Auddi.

Annar stórleikur verður á Akureyrarvelli annað kvöld þegar Stelpurnar okkar í Þór/KA taka á móti Íslandsmeisturum Vals í Pepsi-deild kvenna. Bendi fólki á að hægt er að lesa upphitunarpistil á www.thorsport.is fyrir þá sem hafa áhuga.  Svo vil ég benda fólki á að við verðum með beina netlýsingu frá leiknum á heimasíðu Þórs, nema hvað?

Nú af því að langt líður milli færsla hefur mér láðst að segja ykkur frá því að Stelpurnar léku gegn Fylki um liðna helgi í Árbænum. Sóttu þær þangað 1 stig með því að gera jafntefli gegn heimamönnum  1-1. Auðvitað sendum við sérlegan fréttaritara (Sölmundur Karl) á staðin og settum við inn ítarlega umfjöllun um leikinn á heimasíðu Þórs . Áfram Stelpur í Þór/KA

Á mánudagskvöldið kynnti félagið til sögunnar nýjan þjálfara körfuknattleiksliðs Þórs. Var Böðvar Þórir Kristjánsson ráðin þjálfari. Böðvar er Keflvíkingur en hefur búið á Akureyri til margra ára. Böddi lék í efstu deild bæði með Keflavík og Þór. Frábær leikmaður. Hann hefur nokkra reynslu af því að þjálfa ýmsa flokka og hefur náð góðum árangri. Fréttina um ráðninguna má sjá hér

Meira úr boltanum. Á morgun fer fram leikur Grindavíkur og Þróttar R. í efstu deild karla. Það væri ekki í frásögur færandi nema fyrir þá skemmtilegu staðreynd að tveir af þremur dómurum leiksins eru Þórsarar. Þóroddur Hjaltalín Jr. verður aðaldómari og Eðvarð Eðvarðsson verður aðstoðardómari. Er þetta fyrsti leikur Edda í efstu deild. Bendi fólki á frétt á heimasíðu Þórs þar sem ég skrifaði um þetta í dag. Flottir karlar.

Að öðru leiti gengur lífið sitt vanagang. Palli duglegur, fer í ræktina 3x í viku og út að labba í Kjarnaskóg með frúnni. Hressandi. Labbið gengur vel og sérlega eftir að ég fékk þessa fínu skó sem eru með veltisóla og hjálpar fótafúnum hælbrjóti afskaplega mikið við gönguna. 

 Málsháttur dagsins: Hart mætir hörðu sagði kerlingin og settist á stein

Labbitúr og annar til

Aldrei þessu vant þá brá ég undir mig betri fætinum og fór í göngutúr. Langaði að njóta veðurblíðunnar í fallegu og rólegu umhverfi, án þess að fara langt. Kjarnaskógur er góður staður til þessa. Í þetta sinni þá hafði ég bæði konuna og viðhaldið með. Kjarnaskógur er mikil náttúruperla hér við bæjardyrnar okkar. Fallegar gönguleiðir mikið fuglalíf, leiksvæði fyrir fólk á öllum aldri. Við frúin lögðum saman af stað í gönguna en áður en ég vissi af höfðu leiðir skilið ... að sinni. Palli er ekki sá fljótasti í förum, þökk sé mislukkuðu stigaferðinni forðum daga, en það er allt önnur saga. 

Frúin tók stóra hringin en ég stytti mér leið og tók hálfan hring. Áður en maður kemur að styttingunni má sjá skemmtilegan vegvísi. Á honum stendur Brennivínsrúnturinn. Þar sem ég var bláedrú lét ég af því að fara þann rúnt að sinni.

Sniðugt.... ekki satt?

Gönguleiðin er falleg - myndin segir allt sem segja þarf. 

Þegar maður er ríflega hálfnaður hringinn kemur maður að öðru útskoti. Sú leið liggur í átt að Arnarkletti en áður en þangað er komið kemur maður að Kirkjusteini.

Ótal sinnum hef ég gengið fram hjá á þess að fara og gá.... hvað leynist þarna?

Kirkjusteinn er ansi stór og myndarlegur steinn sem fyrir margt löngu hefur trúlega fallið úr Arnarkletti. Á efri hluta steinsins er skilti

Og þar sem að leiðin að Kirkjusteini er tiltölulega brött þó stutt sé þá er aðstaða til þess að setjast niður og hvíla lúin bein. 

Í skóginum eru ýmislegt sem gleður augað

Og svo endar göngutúrinn seint og um síðir. Og þegar komið er á leiðarenda er að sjálfsögðu rennandi vatn sem þyrstir geta svalað þorsta sínum. Klikkar ekki Íslenska vatnið.

Já ágæti lesandi. Hafir þú ekki notið alls þessa sem Kjarnaskógur hefur uppá að bjóða þá láttu verða að því áður en langt um líður. Það er þess virði.

Þar sem að veðrið var svo gott í dag var mikið myndað. Fyrr um daginn fór ég á útsýnispallinn við kapelluna við kirkjugarðinn og tók mynd yfir hluta pollsins og Oddeyrarinnar. Velheppnuð mynd. 

Í kvöld fór ég svo í Krossanesborgir og naut þess að vera meðal fjölskrúðugs fuglalífs. Aldrei að vita nema ég setji inn myndasyrpa frá þeim göngutúr síðar. En lík þessu myndabloggi með einni mynd sem ég tók í kvöld í Krossanesborgum af hvítmáv sem sat á kletti sem lét sér fátt um finnast um ferðalanginn sem réðist inn á þeirra yfirráðasvæði.

Fróðleikur dagsins: Hvort sem þú leggur á lof eða last, láttu það vera í hófi.

Þvílík stemming

Það var mikið um dýrðir og mikil stemming - allir, mömmur og pabbar, afar og ömmur frænkur og frændur og ............. jebb það var gargandi stuð.

Ég er að tala um hina einu sönnu vorhátíð á Kiðagili. Skralli Trúður tróð upp með pompi og prakt og Heimir Bjarni tók lagið og tryllti lýðinn. Með ólíkindum hvað Skralli eldist vel. Sömu brandararnir ganga ár eftir ár kynslóð eftir kynslóð........... samt er Skralli alltaf eins.

 Það var málað og stóru systur máluðu með litla bró. Þetta var hans dagur en allir tóku þátt. 

Og auðvitað var grillað og sumir snæddu eina með næstu öllu af mikilli innlifun og lét hamagagn allt í kringum sig hafa á sig nein áhrif, ekki nokkur. Einn í heiminum meðan pylsan rann hægt og rólega sína leið alla leið ofaní..... ,,allur matur á að fara uppí munn og ofan í maga heyrð það....."

Um kvöldið þ.e. föstudagskvöldið brá ég mér á völlinn. Mínir menn sóttu litla liðið af brekkunni heim í fyrri leik liðanna í sumar. Liðin hafa mæst í tvígang í vetur og höfðu mínir þá sigur í öðrum og jafntefli í hinum. Nú fór svo að mínir menn máttu játa sig sigraða. Hvað um það baráttan heldur áfram og við spyrjum að leikslokum þ.e. í haust.

Í gær var mikið um að vera. Tók mig til og tók grillið í eitt allsherjar þrif. Nokkuð sem maður verður að gera af og til. Stelpurnar okkar í Þór/KA héldu suður yfir heiðar og spiluðu við GRV í Pepsi-deildinni. Þór/KA fór með öruggan 0-3 sigur þar sem Rakel Hönnudóttir skoraði 2 mörk og Mateja Zver 1. Frábært hjá þeim. 

Dagný vinkona okkar og börnin hennar tvö komu svo í grill um kvöldið. Svínið tæklað með stæl. Fín upphitun fyrir Euróvision. Jóhann Guðrún stóð sig með miklu prýði og var landi og þjóð til sóma. Ég er ekki viss um að ég hefði gert þetta mikið betra..........

Norðmenn stóðu uppi sem sigurvegarar gott hjá þeim. En ég segi enn og aftur sem ég hef svo oft sagt áður ,, þetta er eitt allsherjar samráð"

Svo rúllar lífið áfram nýr dagur með nýjum tækifærum.

Fróðleikur dagsins:  Maður að nafni David Atchison var forseti Bandaríkjanna í einn dag árið 1849, og svaf mest allann daginn af sér