Eyjólfur, ekki meir ekki meir....

Brá undir mig betri fætinum (þótt báðir séu hálf ónýtir) og ók sem leið lá í höfuðborgina í gær. Landsleikur Íslands og Liechtenstein hafði það aðdráttarafl sem til þurfti að ég lagði upp í þetta ferðalag. Skemmst er frá því að segja að þetta var afspyrnu leiðinlegur og illa leikinn knattspyrnuleikur af Íslands hálfu og í raun mega Íslendingar þakka fyrir að hafa náð jafntefli gegn þessu dvergríki. Í raun lélegt skemmtun.

Þegar Eyjólfur var ráðinn landsliðsþjálfari efaðist ég stórlega um að hann væri rétti maðurinn í þetta djobb. Ég bloggaði um það þá og varaði menn við bjartsýni. Eyjólfur var góður knattspyrnumaður um það er og verður ekki deilt. En nú hefur svo sannarlega komið á daginn að efasemdir mínar eiga við rök að styðjast,  hann ræður ekki við svona stórt verkefni sem þjálfun landsliðs er.

Hans tími var ekki kominn þ.e. að taka að sér svo stórt verkefni, sem landsliðsþjálfun er. En ég segi nú er hans tími kominn - að fara frá.  

Meira úr boltanum því stelpurnar í Þór/KA spiluðu við lið Fjölnis í dag  í úrvalsdeildinni í knattspyrnu á útivelli. Tap 2 - 0  var staðreynd og situr nú liðið á botni deildarinnar án stiga. Samkvæmt fréttum voru þær afar óheppnar og óðu í færum stóran hluta leiksins en náðu ekki að koma tuðrunni í netið. Áttu þær t.a.m. tvívegis skot í stöng Fjölnis og sagði fréttamaður á RÚV að Fjölnir hafi sloppið með skrekkinn. Ég hef trú á því að þetta unga og efnilega lið Þórs/KA eigi eftir að hrökkva í gang og hala inn þó nokkur stig í sumar og örugglega halda sæti sínu það þegar upp verður staðið.

Gústi mágur minn sem tók upp á óvenjubundinni aðferð við að losna við nokkur auka kíló er á góðum bata vegi og mun fara aftur til vinnu eftir erfið veikindi undanfarnar vikur. Gott að karlinn er að hressast og sendum við héðan að norðan heiða honum og Hrönn systur minni hlýjar kveðjur.

Í dag er eins og öllum ætti að vera ljóst hinn árlegi ,,Sjómannadagur". Þótt undarlegt megi virðast þá fer eitthvað lítið fyrir honum hér í bæ, sem er þó mikill útgerðarbær. Þótt það sé undarleg tilfinning að ekki skuli vera haldið upp á daginn hér með pompi og prakt er annað sem skyggði hressilega á í daginn. Bik SVÖRT skýrsla hafrannsóknarstofnunnar er mikið áhyggjuefni svo ekki sé nú dýpra í árina tekið, sem er þó við hæfi þar sem þetta er jú sjómannadagurinn, ekki satt?. Maður spyr sig enn og aftur og láir manni hver sem vill þegar maður spyr sig (með ákveðna efasemd í huga) ,,hefur kvótakerfið skilað þeim árangri sem stefnt var að í upphafi?". Ég óska öllum sjómönnum sem eru jú sannar hetjur hafsins til lukku með daginn.

Málsháttur dagsins: Oft verður lítið af því höggi sem hátt er reitt.

Ræða Steingríms - ,,glymur hæst í tómri tunnu

Í kvöld taka mínir menn í Þór á móti Njarðvikingum í 1. deild Íslandsmótsins í knattspyrnu karla á Akureyrarvelli. Fyrir leikinn er Þór í öðru sæti deildarinnar með 7 stig á meðan Njarðvikingar sitja í því  7. með 3 stig. Ef að líkum lætur fáum við gott fótboltaveður á Akureyri í kvöld svo að vonandi fjölmenni fólk á völlinn og hvetur sitt lið til sigurs. Áfram Þór alltaf, allstaðar.

Nú er víðtækt reykingabann á Íslandi orðið að veruleika, því ber að fagna. Þó er til einn og einn veitingamaður sem eru svo einfaldir að halda að rekstur kaffihúsa- og veitingastaða standi og falli með því hvort þar megi reykja eður ei, það er þeirra vandi að halda það.

Steingrímur J. sannaði í gærkvöld enn og aftur að hann er mikill ræðuskörungur. Í ræðu Steingríms kom enn og aftur í ljós að það er ekki nóg að vera góður ræðumaður, maður verður að hafa eitthvað fram að færa. Steingrímur var hvass, hávær og ákveðin þegar hann þrumaði úr ræðupúlti á Alþingi um......... ekki neitt. Það er sorglegt með svo reyndan stjórnmálamann eins og hann að hann skuli ekkert læra - EKKERT.

Fróðleikur dagsins: Glymur hæst í tómri tunnu.

Er fall fararheill?

Fall er fararheill er stundum sagt. Það kann vel að vera en á kannski ekki alltaf við. Í dag eru liðin nákvæmlega 4 ár frá því að minn maður hitti ekki stigann forum daga sælla minninga. Afleiðingin er minn akkilesarhæll hér eftir sem hingað til. Kunningjarnir kalla hann af og til ,,hælbrjótinn".

Get þó verið þakklátur fyrir þá staðreynd að hafa lent á á fótunum, en ekki á hinum endanum, sem öllu jöfnu er öllu viðkvæmari fyrir slíkum misþyrmingum sem þá var boðið uppá. Því þar er jú harði diskurinn geymdur og erfitt að gera við ef eitthvað bjátar á þar.

Fjórum árum þremur aðgerðum síðar og nokkrum skrúfum í báðum fótum og bein námi í annarri mjöð hef vart efni á því að kvarta. Til er fólk sem virkilega hefur það skítt og kvartar ekki.

Þótt maður gangi haltur og skakkur líkt og sjóræningi forðum daga með tréfót kemst maður  þó ferða sinna þótt hægt fari. Kannski best að líta á björtu hliðarnar því ekki verð ég sakaður um að ógna umhverfinu með glannalegum hlaupum til og frá.

Málsháttur dagsins: Hællinn finnur helst hvar skórinn kreppir.

Botninum náð.....

Í fyrsta sinn frá árinu 1939 verða engin skipulögð hátíðarhöld hér á Akureyri á sjómannadaginn, öðru vísi mér áður brá. Konráð Alfreðsson hjá Sjómannafélagi Eyjarfjarðar segir útgerðarfélögin ekki vilja styrkja sjómennina til þessa. Án stuðnings frá útgerðarfélögunum sé þetta ekki gerlegt. Konráð segir í Fréttablaðinu ,,En nú er botninum náð og og hann er góður til að spyrna sér upp".

Hvað getur valdið þessari stefnubreytingu hjá þessum tveimur risum? Er hugsanlegt að þarna endurspeglist barátta Sjómannafélags Eyjafjarðar undir forystu Konráðs Alfreðssonar við að verja réttindi félagsmanna sinna, hver veit?

Þegar Guðmundur Kristjánsson eigandi Brims útgerðarfélags sem áður hét Útgerðarfélag Akureyringa (ÚA) keypti fyrirtækið breyttist margt. Reksturinn skrapp saman hér í bænum, það varð allt í einu óhagkvæmt að gera hér út, sem hafði gegnið skrambi vel í 50 ár það á undan.

Bæjarbúar fóru að kalla Guðmund Kristjánsson eiganda Brims því einkennilega nafni ,,Guðmundur vinalausi". Ég velti því fyrir mér hvort sú staðreynd að þessi fyrirtæki vilji ekki taka þátt í þessum degi geti orðið til þess að auka líkurnar á því að bæjarbúar fari að líta t.d. Guðmund mildari augum?

Ég veit ekki með ykkur en mér finnst afar eðlilegt að ég hafi um það ákveðnar efasemdir.

Málsháttur dagsins: Frá óhreinni keldu rennur óhreint vatn.

Getur hugsast að ,,Kölski" sé kona?

Þrátt fyrir þá staðreynd að ég telji mig vera jafnréttissinnaðan mann þá þykir mér oftar en ekki að umræðan um jafnrétti gangi lengra en góðu hófi gengir, stundum og þá orðið að hróplegu misrétti, og stutt í ofstækið.

Ég ólst upp við það að Guð væri karlkyns, en þó án þess að líta á ,,hann" sem karl - Guð var og er hugtak um hið góða í okkur en ekki karl eða kona, bara alls ekki, Guð er Andi, hvað svo sem það þýðir í raun?.

Samt er til fólk sem amast yfir þessu og lætur þetta fara afskaplega mikið í taugarnar á sér og er farið tala til  Guðs og segja ,,hún Guð"  - allt fyrir jafnréttið.

Þetta er allt gott og blessað, en vekur samt upp ákveðnar spurningar um annað þessu nátengt. Í Biblíunni er talað hvort tveggja um hið góða og einnig um hið illa (Kölska). Þessar tvær andstæður geta ekki verið ólíkari í mínum huga, ekki á nokkurn hátt. Þó eiga þær það sameiginlegt að vera báðar karlgerðar, hvað veldur?

Ef þetta skiptir yfir höfuð einhverju máli í allri trúarlegri umræðu hvort Guð er kona eða maður - af hverju er þá ekki talað um ,,hún Kölski?". Það kann svo sem að vera að þeir hópar sem vilja tala um ,,Guð" sem konu tali einnig um Kölska sem kvenkyns, en það hefur í það minnsta farið fram hjá mér.

Ég get ekki neitað því mér finnst að þegar trúarleg umræða fer út í þá sálma að þvarga um karl- eða kven gera hitt og þetta þá erum við hætt að horfa á það sem skiptir máli. Tilgangur trúarinnar týnist í tilgangslausri umræðu og allir tapa. Ég segi því eins og Doddi ,,gamli" þetta er bara til þess að skemmta Skrattanum. Doddi talaði um hann Skrattann, enda vissi hann ekkert um jafnrétti, blessuð sé minning hans.....

Fróðleikur dagsins: Ekki eru allir helgir sem kirkjur sækja.

Er ekki allt í lagi með fólk????

Er ekki allt í lagi með fólk var það fyrsta sem kom upp í huga mér við lestur þessara frétta. Ætli það sé hægt að fá filmu í þennan grip? Ef svo er ætli það séu þokkaleg myndgæði? fer hún vel í vasa þegar maður fer á mannamót og vill smella af einni og einni mynd?

Com on 50 millur fyrir myndavél sem ekki er á leið í notkun þegar hægt er að kaupa bara ágætis starfræna vél á 50 þúsund. En kannski fer hún bara svo ferlega vel í hillu innan um hitt draslið sem fólk safnar að sér, hver veit?

Málsháttur dagsins: Sínum augum lítur hver á silfrið.

Ein elsta myndavél heims seld á uppboði

Boltinn rúllar og rúllar frábær sigur Þórs.

Í gærkvöld tóku stelpurnar í Þór/KA á móti liði Breiðabliks úr Kópavogi hér á Akureyrarvelli. Stelpurnar í Þór/KA stóðu þokkalega í stórliði Breiðabliki í 2-3 tapi. Greinilegt að Dragan og Moli eru á réttri leið með þetta unga og efnilega lið.

Í dag fór karlalið Þórs suður yfir heiðar og spiluðu við lið Reynis úr Sandgerði í þriðju umferð á Íslandsmótinu í knattspyrnu. Reynismenn höfðu unnið báða leiki sína þegar að þessum leik kom. Þór var með einn sigur og eitt jafntefli úr fyrstu tveimur leikjunum. Þórsarar fóru með 1-5 sigur af hólmi og komu þeir svo sannarlega Reynismönnum niður á jörðina.

Þór er því komið á topp deildarinnar ásamt Grindvikingum og Fjarðarbyggð. Vonandi er þetta það sem koma skal þ.e. að vera í efri kanti deildarinnar. Mörk Þórs í þessum leik; Hreinn Hringsson 2, Ármann Pétur Ævarsson 2 og Mattías Friðriksson.

Greinilegt að uppbyggingarstarf Lárusar Orra Sigurðssonar er farið að skila sér. Hann er einnig með frábærann mann sér til aðstoðar þ.e. Pál Viðar Gíslason fyrrum knattspyrnumann, flott þjálfarateymi.

Svona lítur stigataflan út eftir 3 umferðir efstu fjögurra liða.

1. Þór                 3  2  1  0   8:3    7
2. Grindavík        3 2  1 0     5:1    7
3. Fjarðabyggð   3  2  1  0   3:0    7
4. KA                  3  1  2  0   2:1    5
                                         
Málsháttur dagsins: Hætt er þeim við falli, sem hátt hreykist.

Veit ekki hvort þeir ættu að fagna strax - gæti verið hæpið.

Hemmi er vissulega góður knattspyrnumaður, því er ekki að neyta. En Hemmi verður seint þekktur fyrir það að heppni og lukka fylgi honum í þeim klúbbum sem hann hefur spilað með.

Af þeim liðum, sem Hermann hefur spilað með á Englandi hafa fjögur þeirra fallið  milli deilda. Án efa frekar leiðinleg tölfræði fyrir Hemma. Gárungarnir telja nú víst að liði Porsmouth bíði þau örlög að falla um deild, ef að líkum lætur.

Ekki svo að skilja að ég ali neina von í brjósti mér í þá átt að Hemma bíði þau örlög að falla í fimmta sinn og nú með sínu nýja liði, en hver veit?

Fróðleikur dagsins: Fall er fararheill.  

Redknapp: Alltaf verið hrifinn af Hermanni

Þjófnaður er glæpur, ekki satt?

Enn og aftur undra ég mig á því þegar ég les að eitthvert lið hafi "stolið sigrinum......" Hvernig er hægt að stela sigri t.d. í knattspyrnuleik? En ef það er hægt að stela sigri þurfa þá menn ekki að fara átta sig á því að það er alltaf bannað að stela, alltaf,

Auglýsingin sem Lalli Jones nýjasta ,,kvikmyndastjarnan" leikur í  virðist eitthvað fara í taugarnar á fólki. Auglýsingin kemur eitthvað við viðkvæmar sálir sem lítið þola. Bubbi Morteins mátti leika í auglýsingum hægri vinstri  í forvarnarskyni og græða milljónir á milljónir ofan. Annað gildir með Lalla Jones.

Ég var farin að gera mér vonir um að geta kannski fengið vinnu við að leika í auglýsingum þar sem varað er við hættum þeim sem fylgir því að mála húsin sín sérstaklega ef maður þarf að nota stiga. Ég sé nú að það gæti misboðið einhverjum viðkvæmum sálum ef ég birtist á skjánum haltur og skakkur og færi með varnaðarorð til fólks...... já það er ekki sama Jón og sr. Jón og hvað þá Jones.

Skrapp í leikhús í kvöld og sá einleikinn ,,Pabbinn". Þar fer Bjarni Haukur Þórsson, sem áður gerði garðinn frægan í ,,Hellisbúanum" forðum daga. ,,Pabbinn" er algerlega frábært stykki og mæli ég eindregið með því að fólk gefi sér tíma og fari í leikhúsið til þess að sjá þetta stykki. Hláturtaugaranar  eru svo sannarlega þandar til hins ýtrasta.

Fróðleikur dagsins: Gott stríð og vondur friður verða aldrei til.

Stoltur af mínum manni.

Nú er búið að kynna ráðherralista í hinni nýju ,,Þingvallastjórn" Samfylkingar og Sjálfstæðisflokks. Kom það mér skemmtilega á óvart að Kristján Möller skyldi fá samgöngumálaráðuneytið.  Ég sagði karlinum þetta í kosningabaráttunni að hann og engin annar ætti heima í þessu embætti að kosningum loknum, góður spámaður hann Palli Jóh

Ef litið er á ráðherraskipun Ingibjargar sem hennar fyrsta embættisverk þá er hún strax búin að efna fyrsta kosningaloforðið, enda 50% ráðherra Samfylkingarinnar konur. Bíð spenntur eftir því að sjá hvernig málefnasamningur flokkana lítur út.

 

Fróðleikur dagsins: Það er aðeins einn munur á mér og geðveikum manni, ég er ekki geðveikur.

Kristján: Fékk draumastarfið