Ekki moka dauðir yfir gröf sína sjálfir, eða hvað?

Guðni Ágústson er greinilega algerlega búinn að týna sér. Hann segir að Forsætisráðherra Íslands sem ,,daufur og sinnulaus". Hann kallar eftir því að ríkisstjórnin bregðist við gríðarlegum efnahagsvanda. Ætli Guðni sé búinn að gleyma því að það er afar stutt síðan hann var ráðherra í ríkisstjórn Íslands? Ætli Guðni geri sér enga grein fyrir því að ef mikill efnahagsvandi steðjar að þjóðinni þá á hann gríðarlega stórann þátt í því? Ætli Guðni geri sér ekki grein fyrir því að ríkisstjórn Íslands er enn að losa sig út úr ýmsum vanda sem síðasta ríkisstjórn bjó til? Gerir Guðni sér enga grein fyrir því að hann er algerlega að skjóta sig í lappirnar með málflutningi sínum á síðustu vikum? Er ekki komin tími á að vekja Guðna upp til meðvitundar og láta hann rifja upp þau svör sem hann gaf þáverandi stjórnarandstöðuflokkum þegar menn vöruðu við t.d við stóriðju stefnu hans flokks?

Guðni Ágústsson þarf að átta sig á því að hið háa Alþingi er ekki staður til þess að reyna vera fyndinn eins og honum er svo tamt að reyna gera. Sú aðferð Guðna að reyna vera fyndinn bara til þess að fela vondan málstað er engum til góðs, allra síst honum. Flokkurinn hans Guðna þolir það ekki. En það er samt allt í besta lagi, mín vegna og vonandi heldur hann áfram að grafa þá djúpu holu sem framsóknarmenn hafa verið að grafa. Ég mun bjóða mig svo fram við að hjálpa til við að fylla upp í þá holu þegar flokkurinn hans verður komin niður á botninn, sem er reyndar að gerast um þessar mundir. Það verðum við jú að gera því ekki moka dauðir yfir sig sjálfir, eða hvað?

Eftir fjögurra leikja taphrinu kom sigur. Mínir menn hristu af sér slenið og unnu 92-74 sannfærandi sigur á Hamar úr Hveragerði. Loksins sýndi liðið allar sínar bestu hliðar allan leikinn frá upphafi til loka. Vorum með beina netlýsingu af leiknum á heimasíðu Þórs sem tókst með miklum ágætum. Það er nokkuð sem við munum halda áfram að gera. Leikurinn var skemmtilegur og hin besta skemmtun, fín stemming utan vallar sem og innan. Fyrir þá sem ekki komust á leikinn bendi ég á að Jón Ingi Baldvinsson heldur úti heimasíðu þar sem hægt er að skoða fullt af myndum frá leiknum slóðin er www.123.is/logan. Næsti leikur Þórs verður gegn Tindastóli n.k. fimmtudag og verður leikið á heimavelli Tindastóls. Grannaslagur af bestu gerð, ef að líkum lætur.

Getraunastúss í morgun í Hamri þar sem við Þórólfur tókum á móti getspekingum sem vilja og ætla græða fúlgur á því að tippa. Því miður hefur salan dregist saman á undaförnum misserum. Telja menn að pókerspila á netinu sé það sem menn hafi fært sig yfir í. Lítið fer þó fyrir sögusögnum um að menn séu að græða háar fjárhæðir þar. Þar er þetta svo mikið falið og menn eru í einir fyrir framan tölvuna eftirlitslausir og gleyma stund og stað. Held menn ættu heldur að snúa sér aftur að gamla góða getraunaseðlinum og tippa.

Málsháttur dagsins: Sá sem ekki plantar þarf ekki að vökva.

Athugasemdir

[Ólöf Jóhanna Pálsdóttir, 10.11.2007 kl. 18:17]

Palli minn veistu ekki að alþingismenn eru með þeim gleymnustu mönnum sem til eru?  Það hefur sýnt sig gegnum árin að þeir muna varla vikuna á enda loforð sín og kenna svo öðrum um ófarir sínar.  

[Víðir Benediktsson, 11.11.2007 kl. 16:51]

Alltaf gaman að Guðna.

[Rúnar Haukur Ingimarsson, 11.11.2007 kl. 17:40]

Æi - Palli minn ekki vera svona vondur við Guðna, hann er skemmtilegur stjórnálamaður þó svo að maður sé ekki sammála honum nema í afar fá skipti. Hins vegar veistu að það er ekki sama að vera í stjórn og ekki í stjórn og það skiptir mestu máli að komast í stjórn, skítt með málefnin og hvað menn svo gera þegar þeir komast til valda.

[Edda Agnarsdóttir, 12.11.2007 kl. 00:20]

Það er nú ekki nóg að vera skemmtikraftur á þingi! Gott hjá þínum mönnum að sigra, til lukku með það!