Leita í fréttum mbl.is

Bloggfærslur mánaðarins, maí 2008

Loksins

Ég er haldin einskonar fælni......... þegar rignir hleyp ég í skjól. Og akkúrat þess vegna gef ég mér tíma nú til að blogga.

Ljósmyndanamskeið1 037Á fimmtudagskvöldi lauk ljósmyndanámskeiði sem ég skráði mig á um daginn. Námskeiðið var sett upp einvörðungu fyrir fólk með myndavélar eins og þá sem ég á. Það gerir námskeiðið enn betra en alla. Ekki skemmir heldur að kennarinn hann Þórhallur Jónsson jafnan kenndur við Pedrómyndir er algera snillingur ekki bara snjall ljósmyndari heldur frábær kennari.

Farið var mjög nákvæmlega í allar grunnstillingar á vélinni sem eru margbrotnari en mann hafði grunað. Farið vel yfir og reynt að kenna manni hvað hugtök eins og ,,ljósop, hraði, íso, yfir- og undirlýsing og guð má vita hvað, hvað þau þíða. Svo nú er nýjasta bókin á náttborðinu bók eftir Þórhall Jónsson um ljósmyndun með Canon 400D.

Ljósmyndanamskeið1 092Milli daga setti hann okkur fyrir verkefni sem við áttum að leysa. Taka myndir í Gullinsniði, panorama, landslagsmyndir, flash myndir utandýra og flash - lausar innandyra. Svo nú er bara bíða og sjá hvort öll þau fræði sem Þórhallur uppfræddi okkur um skili okkar sem betri ljósmyndurum? Maður verður jú að vona það. Myndin hér að ofan er tekin út í Krossanesborgum og horft í átt að Kaldbak. Fallegt sólarlag sem vonandi skilar sér í þessum myndum. En ef þær virðast óskýrar þá smellið á þær til að þær birtist í fullum gæðum.

Stelpurnar okkar í Þór/KA léku í Vísabikarkeppni KSÍ á föstudagskvöldið gegn 1. deildarliði Völsungi frá Húsavík. Lið Völsungs veitti úrvalsdeildarliðinu harða mótspyrnu. Allt leit út fyrir sigur þeirra þegar Stelpurnar okkar náðu að jafna leikinn þegar komið var þrjár mínútur fram yfir venjulega leiktíma og komu leiknum í framlengingu. Þar reyndist úrvalsdeildarliðið sterkara og hafði sigur 1-2.

Föstudagskaffi í Hamri eins og venjulega þar sem málin eru rædd og þau leyst. Fór svo með Döggu og krökkunum á Glerártorg en það var verið að opna nýbygginguna sem þar hefur verið að rísa. Glæsileg bygging. Af örtröðinni og hamagangurinn sem myndaðist við einhverja leikfangabúð sem ég man ekki hvað heitir enda er nafnið vitlaust skrifað. Greinilegt á látunum að það er engin kreppa í gangi þegar nýjar leikfangabúðir eru opnaðar. Fékk mér sæti á torginu og horfði á úr fjarlægt þessa vitleysu svo ég yrði ekki troðin undir.

Mitt í allri þessari kreppu sem er að skella á eða er skollin á skelfur allt og nötrar á suðurlandinu. Tekur á að sjá hvaða áhrif þetta hefur á fólkið sem þarna býr. En þetta vekur mann enn og aftur til umhugsunar hversu vel við  íslendingar búum þegar svona gerist. Ættum því að vera meira meðvituð um þegar hörmungar úti í hinum stóra heimi ríða yfir eins og nýlega í Kína. Fólkið á suðurlandinu á alla mína samúð og vonandi fer að hægjast um.

Skaust með minni ekta frú í leikhús í gærkvöld. Sáum ,,Alveg brilljant skilnað" með Eddu Björgvins". Þvílík snilld, þvílík skemmtun. Þarna gleymdi maður stund og stað, mikið hlegið mikið gaman. Ég mæli með þessari sýningu.

Það er hætt að rigna, glittir í sólina....... ég er farin út.....meira síðar.

Fróðleikur dagsins: Algengasta nafn í heimi er Mohammed.

 


Fyrstu handtökin.

Hafist handaFínn dagur í gær til þess að rífa sig upp á rassga...... og gera eitthvað af viti. Kjörnar aðstæður til að bóna bílinn.  Til þess naut ég góðra aðstoðar frá tveimur af barnabörnunum þ.e. Margréti Birtu og Elínu Ölmu.

Og auðvitað hófst þetta með föður/afalegri kennslu. Gera svona og svona. Alls ekki hitt og þetta fræðin útskýrð sem best sá gamli gat.

Ekki stóð á því að hlustað var með mikilli athygli. Skvísurnar heldur óþolinmóðar og fannst afi taka sér heldur langan tíma í úrskýringar. ,,Afi við kunnum þetta já, já og allt það". Afi setur upp mikinn merkissvip sem átti að vera gáfumannalegur og sagði ,,stelpur mínar lengi býr að fyrstu gerð og allt það bla, bla, bla.....". ,,Hvaða gerð?". Ok, hefjumst handa.

Lagt sig framElín sem er ný búinn að sleppa hjálparhjólunum á reiðskjótanum taldi vissar að taka ekki niður hjálminn, maður veit jú aldrei hvað getur gerst. Hjálmur er jú höfuðlausn, ekki satt?

Þær systur héldu dampi. Ekki var slegið slöku við fyrr en yfir lauk. Reyndar notaði afi bara letingjabón eins og gárungarnir kalla það Sonax eða eitthvað álíka létt og lagott. Skvísurnar dóu ekki ráðalausar þegar kom að því að bóna stuðarana að neðan. Maður beygir sig ekki maður bara leggst á bakið öll vandræði á bak og burt. En afi skammaður að lokum fyrir að leyfa þess aðferð enda malbikið ekki það hreinasta í heimi sem þær lögðust á. En comme one, nýja þvottavélin redda þessu, ekki satt?

InnlifunÍ gærkvöld hófst kennsla á ljósmyndanámskeiði sem ég skráði mig á fyrir skömmu hjá Þórhalli í Pedrómyndum. Garnandi snilld. Eingöngu kennt á Canon 400D eins og ég á sem gerir alla kennsluna markvissari. Glæsileg bók fylgir með í kaupunum sem Þórhallur útbjó eingöngu fyrir þessar vélar, enn og aftur snilld. Svo vonandi mun ljósmyndun hjá manni eitthvað fara fram þegar fram líða stundir - vonandi.

Þótt ekki hafi veðrið verið eins gott í dag og í gær samt gott. Þegar hitinn verður óbærilegur er gott að kæla sig niður. Ís og klaki hjá ömmu og afa, hvað er betra? Eins og sést á myndinni lifði Jón Páll sig þokkalega í inn í þá athöfn að gera ísnum góð skil. Reynar er það venjan hjá þessu gutta þegar matur er annars vegar þá vandar maður sig og sýnir matnum þá virðingu að gera honum góð skil.

Fróðleikur dagsins: Þýska þingið telur 672 þingmenn og er stærsta kjörna lögþing heimsins.

Kóngurinn fallinn

Til er máltæki sem segir ,,það sé auðveldara að sjá flísina í auga náungans en bjálkann í eigin..." Mikið á nú þetta vel við núna. Hef sagt það áður og segi það enn og aftur ,,Kóngurinn er fallinn".

Málsháttur við hæfi: Hvort sem þú leggur á lof eða last, láttu það vera í hófi.
mbl.is Ummæli Guðjóns til umfjöllunar hjá aganefnd
Tilkynna um óviðeigandi tengingu við frétt

Honum fyrirgefst enda ekki fullorðin - enn

Bloggþurrð hér er ekki sökum leti, fýlu, ólundar eða af neinum óeðlilegum orsökum. Með hækkandi sól fjölgar þeim stundum sem maður heldur sig utandyra.

Ísland komst upp úr undankeppninni í Júró. Ég verð að játa að ég eyddi kvöldstund í að horfa á. Friðrik Ómar og Regína stóðu sig hreint út sagt frábærlega. Horfði einnig á sjálfa aðalkeppnina. Ég hafði reyndar aðeins heyrt þau lög sem tóku þátt í riðlinum með Íslandi. Þegar upp er staðið held ég að Íslendingar geti vel við unað með sitt. Fínt lag, frábærir flytjendur. Það sem vakti hvað mesta athygli hjá mér var gremja og fýla í Sigmari kynni. Þegar á leið í stigagjöf hneykslaðist hann á því að sum lönd gætu gengið að því sem gefnu að fá stig frá nágrönnum sínum. Í mínu huga ekkert við það að athuga. En Sigmari þótti heldur ekki að því að ætlast til að nágrannalöndin okkar gefi okkur stig, af hverju? Vill hann mismunun? ég veit ekki hvað á maður að halda?.

Í gær vorum við með öll barnabörnin. Byrjuðum á að fara í heimsókn með þau til langafa-- og ömmu. Mikið fjör. Skruppum á andapollinn þar var mikið fjör. Slagsmál milli tveggja fugla í harðari kantinum, vöktu mikla gremju og undran hjá börnunum. Því næst skroppið með hópinn inn í Vín og allir fengu sér ís. Krakkarnir trúðu mér fyrir því í bíltúrnum að þau vissu að Ísland myndi vinna Júró, því miður fór ekki eins og þau hugðu en þau finna eitthvað gott úr þessu.

Stelpurnar okkar héldu suður yfir heiðar og sóttu stöllur sínar í HK/Víkingi heim. Skemmst er frá því að segja að Stelpurnar okkar unnu 0-2 sætan sigur. Stelpurnar í Þór/KA eru með býsna sterkt lið og er ég klár á því að þær munu ljúka keppni í haust ofar á stigatöflunni en margan grunar.

Strákarnir okkar í Þór héldu einnig suður yfir heiðar og sóttu Leikni heim. Þrátt fyrir að vera einum manni undir frá miðjum síðari hálfleik unnu mínir menn 2-3 sigur og eru nú í 3. sæti deildarinnar. Gott hjá þeim. Sem sagt góð helgi hjá okkur Þórsurum.

Hef fylgst með undarlegum skrifum og háttalagi hjá Sverri Stormsker. Ræðst hann þar á fyrrum félaga sína með skítkasti og drulli sem hæfir ekki fullorðnu fólki. Honum fyrirgefst þar sem hann er enn ekki orðin fullorðin. Sverrir sakar Stefán Hilmarsson t.d.  um að kunna ekki að meta það að hann hafi dregið hann á lappirnar með því að láta hann syngja lögin sín. Ég held hins vegar að ef Sverrir hefði ekki fengið topp söngvara til að syngja lögin þá hefði þjóðin aldrei kynnst honum og verkum hans.

Fróðleikur dagsins: Betra er að standa á eigin fótum en annarra.

Sláttur hafinn.

HeimsmeistariVegna mikilla anna hefur lítill tími gefist til að blogga. Mikill undirbúningur vegna opins húss í Hamri félagsheimili Þórs sem haldið var á laugardag. Þar var mikið um dýrðir. Það sem mér stóð einna næst var að þá var afhjúpaður verðlaunaskápur með öllum verðlaunum sem pabbi vann sem kraftlyftingamaður á árunum 1979-1991. Sá ,,gamli" var á 50. aldurs ári þegar hann hóf að æfar lyftingar. Varð tvívegis heimsmeistari öldunga 50 ára og eldri og einu sinni silfurhafi í HM.

Allt of langt mál að telja allt það upp sem gert var á opna húsinu en ég bendi á frétt á heimasíðu Þórs þar sem hægt er að lesa allt sem þar var gert.

Hrönn ,,litla" systir og Gústi maðurinn hennar ásamt honum Sævari ,,litla" komu í tvígang í heimsókn um helgina. Þau brugðu land undir fót og komu norður til að vera viðstödd á opnu húsi hjá Þór. Þegar þau svo héldu á heimaslóðir gripu þau græðlingana með sér og ef að líkum lætur eru búið að stinga þessum spýtum niður í frjósama jarðvegin í Njarðvíkurborg.

Leikur hjá karlaliði Þórs á sunnudag. Þeir fengu eyjapeyja í heimsókn. Gestirnir komu og sóttu gull í greipar minna manna og unnu 0-2 sigur. Þótti það helst til sárt í ljósi þess að dæmd voru tvö mörk af mínum mönnum, en svona er boltinn það er ekki alltaf jólin.

Fengum þær mæðgur í heimsókn Jódísi og Huldu. Jódís eða Dísa í mogganum eins og hún er svo oft kölluð varð áttræð í síðustu viku en hélt ekki uppá afmælið sitt. Því brugðum við á það ráð að fá þær í heimsókn og buðum þeim í mat. Grilluðum kjúkling og áttum svo skemmtilegt spjall fram eftir kvöldi. Ekki skemmti það að Hulda skuli hafa komið með en hún hefur verið búsett í Noregi undanfarin 20 ár. Takk fyrir kvöldið Dísa og Hulda.

Hetjan og sláttumaðurinnSláttur er hafinn í Drekagilinu. Dró fram sláttuvélakaggann og renndi yfir grasflötina. Litla hjartað í yngsta barnabarninu með stóra nafnið Jón Páll var vægast sagt hálf smeykur við sláttuvélina. Þótti honum vissara að láta Sölmund frænda halda á sér til þess að tryggja að ekkert færi úr skorðum.  

Þetta eru jú stórhættuleg tæki og vissara að taka enga áhættu. Til að tvítryggja allar varnir tóku þeir félagar garðslönguna og höfðu hjá sér til öryggis ef þeir þyrftu að grípa til varnaraðgerða. Veit svo sem ekki hvaða gagn þeir töldu af slöngunni enda ekki tengd við vatnskranann. Sálrænt hjá þeim félögum. Getur verið að Sölli hafi sjálfur verið hræddur?

Fórum svo í gærkvöld á leik hjá stelpunum okkar. Þær tóku á móti bikarmeisturum KR. KR er spáð Íslandsmeistaratitlinum í ár. Því áttu allflestir von á auðveldum sigri hjá Vesturbæjarstórveldinu. En annað kom á daginn. Stelpurnar okkar komust í tvígang yfir í leiknum  og voru 2-1 yfir í hálfleik. KR náði svo að jafna og með sannkallaðri meistaraheppni skoruðu þær sigurmarki og unnu 2-3. Stelpurnar okkar áttu t.a.m. skot í þverslá. Þær voru betri aðilinn allan leikinn og hefðu verðskuldað alla vega jafntefli. En víst er að mikill uppgangur er í liðinu og þær eru til alls líklegar í sumar. Það sem vakti hvað mesta athygli á leiknum var mikill fjöldi áhorfenda sem hvöttu og stóðu þétt að baki liðsins. Ég segi áfram stelpur í Þór/KA. Fyrir þá sem vilja er hægt að lesa frábæra umfjöllun um leikinn á heimsíðu Þórs sem Sölmundur skrifaði. 

Fróðleikur dagsins: Það eru engar klukkur í spilavítum í Las Vegas.

Grænir fingur...

Græðlingur - græningiKona eins suður með sjó sem er með ja svona græna fingur lagði land undir fót til að bjarga trjám frá förgun og potaði þeim niður garðinn heima hjá sér. Hún frétti því næst að ég hafi verið að láta snyrta hjá mér runnana. Frekar en að vita til þess að afskurðurinn endi í endurvinnslunni ætlar hún að leggja land undir fót og bjarga sprotunum. Þeir eru komnir í fötu vel vökvaði og bíða þess að vera sóttir. Þegar ég fór að tína upp sprotana og setja í fötu fékk ég til þess hjálp frá elsta barnabarninu mínu. Eins og sjá má á myndinni þurfti hún að skoða þessa sprota vel og vandlega áður en þeir fóru í fötuna. Hver veit nema þessi snót eigi eftir að fá græna fingur eins og stór frænka hennar suður með sjó?

Fór í Bogann í gærkvöld og horfði á fyrsta deildarleik Þórs í knattspyrnu á þessari leiktíð. Gestirnir sameinað lið KS/Leifturs sóttu ekki gull í greipar minna manna. Leiknum lauk með sigri minna manna í Þór 3-2.

Svo sem ekki besti knattspyrnuleikur sem ég hef orðið vitni af en sigur samt og það er nákvæmlega það sem öllu máli skiptir. Hvort sigurinn er fallegur eða hvernig spyr engin að..... 3 stig í hús og ég sáttur.

Uppsagnir hafnar í bankageiranum. Kemur mér ekki á óvart. En mér þykir mjög athyglisvert að fylgjast með framvindu mála. Hvaða skýringar ætli þessi jakkaklæddu snyrtipinnar sem aldrei hafa dýpt fingri í kalt vatn segi? Eru þeir búnir að gleyma því sem þeir sögðu í ,,góðærinu" þar sem gróðinn væri komin til að vera? Hverju ætli þeir myndu svara ef þeir yrðu spurðir að því hvort þeir væru ekki til í að skila til baka hluta kaupaukans sem þeir skömmtuðu sér í ,,góðærinu"? Væri það ekki sanngjarnt? Ef þeir eiga græða þegar bankinn græðir, hver á þá að blæða þegar hallar undan fæti - hvernig væri að fá þessa hvítflibba til að svara þeirri spurningu?. Ég veit ekki með ykkur en ég væri til í að rökræða við þá.

Þess vegna ætla ég á opin fund í kvöld þar sem Ingibjörg Sólrún Gísladóttir verður aðalgesturinn og yfirskrift fundarins er ,,Þjóðarsátt um velferð". Ég ætla fara og hlusta og hver veit nema maður segi það sem manni býr í brjósti, hver veit?

Pæling dagsins: Af hverju er "skammstöfun" svona langt orð?

Maður dagsins er Sölmundur Karl

Maður dagsins er  alla jafna hæglátur. Ekki skaplaus, getur fokið í hann ef á þarf að halda en fer sparlega með það. Þykir nægjusamur, hefur sterkar skoðanir á lífinu. Einn af hans stórum kostum er að hann getur rökrætt um skoðanir sínar og annarra án þess að álíta sína skoðun þá einu réttu, kann að hlusta.

Þolir illa óréttlæti. Liðin sem hann heldur með leika aðallega í rauðum og hvítum búningum. Ekki nóg með að fótboltaliðin hans eru rauð og hvít heldur er Formúluliðið hans eld rautt.  Hann notar skó nr. 42 ca grannvaxinn og meðal maður á hæð.

Ég endaði bloggfærslu gærdagsins með þessari spurningu ,, Hvað á maður dagsins á morgun og Hildur Vala fyrrum Idol stjarna sameiginlegt?". Engin hefur gert tilraun til þess að svara spurningunni, svo ég bæti örlítið við hana í dag og spyr ,,Hver er maður dagsins í dag og af hverju er hann maður dagsins?".

FeðgarNú þar sem svör eru komin við spurningu dagsins er vel við hæfi að skella inn mynd sem tekin var nú skömmu fyrir hádegið á afmælisdegi stráksins.

Þar sem veður er með ágætasta móti var lambalæri skellt á grillið. Með okkur á myndinni er Elín Alma.

Og þar sem allar gátur dagsins hafa verið leystar er vel við hæfi að benda fólki á að það er heitt á könnunni í Drekagilinu og eitthvað af tertum og brauði á boðstólnum.

Afmælisbarn dagsins er eins og þið kannski vitið ritstjóri á www.politik.is og stýrir þeirri síðu af miklum myndarskap. Af tilefni dagsins setti hann inn ritstjórnargrein . Góð grein hjá kappanum og skora ég á ykkur ágætu bloggarar að fara á síðuna www.politik.is og lesa greinina.

Málsháttur dagsins: Alls staðar er sá nýtur er nokkuð kann

Hvað er svona merkilegt við þennan dag?

Ég verð stundum alveg hringlandi ruglaður á þessum frídögum. Hvað gerðist á uppstigningardag? af hverju er Hvítasunnudagurinn haldin hátíðlegur og af hverju er annar í Hvítasunnu og ......?

Sá stóriKonan mín á alltaf svör við þessum bjána spurningum mínum. Hvað veldur er ég svona andsk... vitlaus eða hún svona ferlega gáfuð? Sennilega sitt lítið af hvoru. Halldór stóri bró leit við í heimsókn í dag ásamt konu og tveimur af elstu börnum sínum. Langt síðan þau hafa öll kíkt. Hann búsettur í stórbænum sem kenndur er við Mosa, dóttir hans og sonur bæði búsett í smábænum sem kenndur er við reyk og vík. Telma sem er elst barna þeirra er lögfræðingurinn í ættinni. Þangað vonast maður til að geta leitað ef að manni verður sótt, já varið ykkur. Sprenglærð skvísa hún Telma og heimsvön enda búið víða erlendis.

Bjarmi er svo miðbarnið. Hann kemur úr ætt þar sem mjög margir hafa lært húsasmíði. Og auðvitað sannast á honum máltækið góða ,,sjaldan fellur smiðurinn langt frá stillansinum" hann er lærður húsasmiður. Yngsta barnið þeirra hann Bjarki Þór varð eftir heima enda getur hann ekki verið þekktur fyrir það að ferðast með mömmu og pabba, iss það gera bara smábörn. En að öllu gamni slepptu gaman að fá þau í heimsókn, takk fyrir og verið velkomin aftur og aftur og aftur og...........

Þá var einnig tengdasonurinn í heimsókn með barnabörnin. Ég sá mér leik á borði og lagði þessa kvikindislegu spurningu fyrir hópinn ,,hvað gerðist á Hvítasunnu?". Þögn sló á hópinn, vandræðaleg þögn ríkti. Talsverður tími leið þar til sá fyrsti þorði að svara ,,ég veit það ekki". Þegar allir höfðu játað að vita ekkert hvað sé svona merkilegt við þennan dag, kom svarið. Frú Margrét vissi það, nema hvað? Það var ekki laust við það að maður hafi verið hálf skömmustulegur.

Í blá lokin já það er farið að vora að nýju svo vonandi þarf ég ekki að moka sólpallinn fyrr en í haust .... þótt allt hafi stefnt í það á föstudagskvöldið.....

Ætla ekki að vera með málshátt dagsins eða slagorð. Þess í stað set ég inn spurningu dagsins, sem hljóðar svo ..... 

,, Hvað á maður dagsins á morgun og Hildur Vala fyrrum Idol stjarna sameiginlegt?".


Vorið er komið og grundirnar gróa.....

VorkomaÞegar ég vaknaði í morgun hafði ég að orði við spúsu mína hvað það væri yndislegt að vaka upp við fuglasöng. Vorið er komið og grundirnar gróa...... og allt það. Mikið lá nú vel á karli, þetta yrði góður dagur. Eins og í alvöru bíómynd. Ég raulaði fyrir munni mér lagstúfinn ,,Lítill fugl á laufgum teigi, losa blund á mosasæng...." já í A-dúr.

Eins og næstum alla aðra föstudaga myndi þessi dagur hefjast á því að fara í Hamar og drekka morgunkaffi með félögunum. Málin rædd og leyst í eitt skipti fyrir öll.

Hryssingslegt veður í morgunsárið, blaut og skítug og heldur kalt. Hitinn rétt skreið yfir frostmarkið, þetta hlýtur að skána, eða hvað?

Fór í dag með barnabörnin í bíltúr. Bryggjurútur. Var staðráðin í að þegar á bryggjuna kæmi þá yrði ferið í stutt labb og kíkt á bátanna. Þegar í Bótina var komið var farið að snjóa og ég sem hélt að það væri komið sumar, eða í.þ.m. vor? Kannski ekki rétt að segja snjókomma, nær að segja slydda.

OjÞótt maður búi á landi vatns, elds og ísa brennir maður sig sífellt á að fara vanbúinn að heiman. Auðvitað klæddi ég börnin eins og um hásumar væri og sjálfur klæddur eins og ég væri staddur á Spáni. Svo lítið varð úr að við færum á labb.

Ekki festi þó snjó - þ.e.a.s. ekki strax. Þegar heim var komið vakti mikill fjöldi ánamaðka á bílaplaninu athygli Jón Páls. Við félagarnir fórum í smá rannsóknarvinnu. Eftir samningaviðræður sem stóðu yfir í stutta stund fékkst sá stutti til þess að handleika einn.  Það fór hrollur um þann stutta. Hann hristi sig og ýldi - oj-barasta afi oj.

Eftir að hafa staðið eins og frosin í stutta stund og harkað af sér meðan afi smellti af einni mynd tók sá stutti undir sig stökk hentist inná miðja lóð og losaði sig við ,,Skrímslið". Afi koma inn.

VorkomaÞað létti heldur á manni brúnin eftir að hafa séð veðurspánna í varpinu í kvöld. Því það birtir upp öll él um síðir. Og víst er að á því verður engin undantekning nú.

Ég ætla þó að vona kæru bloggvinir að halda ekki að ég sé að fyllast einhverju vonleysi með þessu væli yfir veðrinu. Mér finnst þetta hreint út sagt dásamlegt. En allt þetta pláss sem fór undir þetta blaður um veðrið var bara vegna þess að ég vissi nákvæmlega ekkert hvað ég ætti að blogg annað að viti.

Búinn að fá nóg af vandræðunum í borginni við sundin blá þar sem allt snýst um vandræðaganginn í kringum Magnússynina sem ættaðir eru að norðan þ.e. Ólafur og Jakob.

Fróðleikur dagsins: Að meðaltali eru framkvæmdar þrjár kynskiptiaðgerðir daglega í Bandaríkjunum.

Ekki sama vegalengdin - nei

Í gær brá svo við að þau heiðurshjón og tengdafrændfólk mitt Marta og Jónsi sem búa á Sauðárkróki litu við hjá okkur. Þau hafa verið talsvert mikið duglegri við að renna hingað í heimsókn en við að renna til þeirra. Gæti verið að það sé lengra héðan á Krókinn en fyrir þau að skjótast hingað, varla en hver veit? Greinilegt er að fyrir þau er þetta ekki meira mál en fyrir mig að skutla frúnni í Bónus. Jónsi farin að stríða mér óþægilega mikið á því hve löt við höfum verið að rúlla vestur en hann sem segist vera farin að skutlast þetta vikulega. Ætli maður verði ekki að manna sig upp áður en allt of langt um líður og kíkja á Krókinn, því Jónsi er lúmskt stríðinn og gæti haldið áfram að atast í mér ef ekki verður gerð bragabót á áður en langt um líður. En kannski skekkir það myndina að Jónsi er á nýjum og andskoti flottum jeppling svo kannski er það skýringin á því hve óstöðvandi þau eru? Jónsi, Marta - þetta fer að koma hjá okkur.

Það er heldur farið að róast hér á heimilinu þ.e. það sem snýr að skólafólkinu. Sölli hefur lokið öllum prófum og liggur í leti og nýtur þess að gera andsk... ekki neitt. Styttist í að hann fari að vinna. Búinn að ráða sig í vinnu í bókhaldinu á skrifstofum Akureyrarbæjar. Sædís á eitt próf eftir. Brjálað að gera hjá henni. Strangar æfingar hjá kórnum enda styttist í Þýskalandsferðina. Ekki tjóir að fara illa undirbúinn og fara út af laginu þegar á hólminn verður komið í landi Angelu Merkel.

Eitthvað enn eftir hjá Döggu en hennar sumarvinna hefst á morgun. Munu börnin verða talsvert hér hjá afa og ömmu í sumar. Nú ber svo við að nýju nágrannarnir sem búa í við hliðina á okkur eru með litla stelpu sem er í barnakórnum með Margréti og Elínu svo trúlegt má telja að það verði fjör hér þegar þessar skvísur koma saman.

Nú er heldur betur farið að styttast í að fótboltinn hinn íslenski fari að rúlla. Við feðgar munum sjá um skrif fyrir sameinað lið Þór/KA kvenna sem leikur í úrvalsdeildinni. Það verður mikið gaman og mikið fjör. Þetta verður með svipuðum hætti og við erum að gera fyrir körfuboltann.

Hafði samt gaman að því að horfa á Kastljósið í kvöld þar sem Ólafur F. Magnússon borgarstjóri reyndi af veikum mætti að svara fyrir ráðningu Jakobs Magnússonar. Ég hef svo sem enga skoðun á því hvort þetta er rétt eða rangt, en alla vega held ég að Ólafur ætti að setja sig í langt fjölmiðla bann. Maðurinn tapar öllum orrustum sem hann leggur í. Er svipað og með Sturlu fyrrum samgönguráðherra - ef þeir opna munninn þá klúðra þeir málum. Já ég segi enn og aftur ,, hún er skrítin þessi pólitík".

Málsháttur dagsins: Þar sem hræið er, þangað safnast ernirnir.

Næsta síða »

Höfundur

Páll Jóhannesson
Páll Jóhannesson

Akureyringur, eiginmaður, pabbi, afi, Þórsari,  jafnaðarmaður, City - fan og Áfram Þór alltaf, allstaðar.

Hafi einhver áhuga að senda mér tölvupóst þá sendið á pallijo@internet.is

Mars 2024
S M Þ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

271 dagur til jóla

Innskráning

Ath. Vinsamlegast kveikið á Javascript til að hefja innskráningu.

Hafðu samband